17 თებერვალს Startup Grind-მა მორიგი შეხვედრა გამართა, რომლის ფარგლებშიც ქართული სტარტაპის, Payze-ს თანადამფუძნებელმა, გეგა წურწუმიამ აუდიტორიას თავისი გამოცდილება გაუზიარა, სტარტაპის განვითარების ეტაპებსა და პარტნიორობებზე ელექტრონული კომერციის ისეთ გიგანტებთან, როგორებიცაა Shopify, Wix და Visa.
მოგეხსენებათ, Payze ქართული ფინანსური ტექნოლოგიების – ფინტექ – სტარტაპია, რომელიც ფულის მიღების ინოვაციური ონლაინ-საშუალებაა, როგორც ტექნიკური, ასევე ინტეგრაციის ყველაზე გამარტივებული ხელსაწყოებით მათთვის, ვინც ონლაინ სივრცეში პროდუქტს ან სერვისს ყიდის.
კერძოდ, რა თემებს ეხებოდა შეხვედრა?
უმეტესწილად, სტარტაპერმა Payze-ს მიერ განვლილ გრძელ გზასა და მიღწევებზე ისაუბრა. განიხილა, თუ როგორი იყო Payze-ს პირველი ნაბიჯები და როგორ დაძლია სტარტაპმა ის სირთულეები, რომლებიც მას პირველ ეტაპზე შეხვდა.
მან ყურადღება გაამახვილა იმაზეც, თუ რამდენად დიდი და დადებითი გავლენა იქონია სტარტაპის წარმატებაზე Y Combinator-ისა და 500 Georgia-ს აქსელერაციის პროგრამებმაც. აქ მიღებულმა კავშირებმა, მენტორების რჩევებმა და გამოცდილებამ მას და მის თანამოაზრეებს მნიშვნელოვნად გაუმარტივა სტარტაპის შექმნისა და განვითარების გზა.
გარდა ამისა, აქსელერაციის პროგრამის ფარგლებში Payze-მ შეძლო Shopify-სა და Wix.com-ის დამფუძნებლებთან პარტნიორობის დამყარება, რამაც მნიშვნელოვნი წარმატება მოუტანა ქართულ სტარტაპს.
შეხვედრის საბოლოო ეტაპზე, დამსწრეებსა და სპიკერს ტრადიციულად მიეცათ შანსი ნეთვორქინგისთვის დაეთმოთ დრო, რომლის განმავლობაშიც ერთმანეთს საკუთარი იდეები, აზრები და გამოცდილება გაუზიარეს.
